kal subH ke matla'-i-taabaaN se jab 'aalam buq'ah-i-nuur hu'aa
sab chaaNd sitaare maaNd hu'e Khurshiid kaa nuur zuhuur hu'aa
mastaanah havaa-i-gulshan thii jaanaanah adaa-i-gulban thii
har vaadii vaadii-i-Aiman thii har koh pih jalvah-i-tuur hu'aa
jab baad-i-sabaa mizraab banii har shaaKh-i-nihaal rabaab banii
shamshaad-o-chanaar sitaar hu'e har sarv-o-saman tanbuur hu'aa
sab taa'ir mil kar gaane lage mastaanah vuh taaneN uRaane lage
ashjaar bhii vajd meN aane lage gulzaar bhii bazm-i-suruur hu'aa
sabze ne bisaat bichhaa'ii thii awr bazm-i-nashaat sajaa'ii thii
ban meN gulshan meN aaNgan meN farsh-i-sanjaab-o-samuur hu'aa
thaa dil-kash manzar-i-baaGh-i-jahaaN awr chaal sabaa kii mastaanah
is Haal meN ek pahaaRii par jaa niklaa Naazir diivaanah
chiiloN ne jhaNDe gaaRe the parbat par chhaa'onii chhaa'ii thii
the Khaime Dere baadal ke kuhre ne qanaat lagaa'ii thii
yaaN barf ke tode galte the chaaNdii ke favvaare chalte the
chashme siimaab ugalte the naaloN ne dhuum machaa'ii thii
ik mast qalandar Jogii ne parbat par Deraa Daalaa thaa
thii raakh jaTaa meN Jogii kii awr aNg bhabuut ramaaii thii
thaa raakh kaa Jogii kaa bistar awr raakh kaa pairaahan tan par
thii ek laNgoTii zeb-i-kamar jo ghuTnoN tak laTkaa'ii thii
sab Khalq-i-Khudaa se begaanah vuh mast qalandar diivaanah
baiThaa thaa jogii mastaanah aaNkhoN meN mastii chhaa'ii thii
Jogii se aaNkheN chaar hu'iiN awr jhuk kar ham ne salaam kiyaa
tiikhe chitvan se Jogii ne tab Naazir se yih kalaam kiyaa
kyoN baabaa naa-Haq Jogii ko tum kis liye aa ke sataate ho
haiN paNkh-pakheruu ban-baasii tum jaal meN in ko phaNsaate ho
ko'ii jhagRaa daal-chapaatii kaa ko'ii da'vaa ghoRe-haathii kaa
ko'ii shikvaa saNgii-saathii kaa tum ham ko sunaane aate ho
ham Hirs-o-havaa ko chhoR chuke us nagrii se muNh moR chuke
ham jo zanjiireN toR chuke tum laa ke vahii pahnaate ho
tum puujaa karte ho dhan kii ham sevaa karte haiN saajan kii
ham jot lagaate haiN man kii tum us ko aa ke bujhaate ho
sansaar se yaaN mukh pheraa hai man meN saajan kaa Deraa hai
yaaN aaNkh laRii hai piitam se tum kis se aaNkh milaate ho
yuuN DaaNT-DapaT kar Jogii ne jab ham se yih irshaad kiyaa
sar us ke jhukaa ke charnoN par Jogii ko ham ne javaab diyaa
haiN ham pardesii sailaanii yuuN aaNkh nah ham se churaa Jogii
ham aa'e haiN tere darshan ko chitvan par mail nah laa Jogii
aabaadii se muNh pheraa kyoN jaNgal meN kiyaa hai Deraa kyoN
har maHfil meN har manzil meN har dil meN hai nuur-i-KHudaa Jogii
kyaa masjid meN kyaa mandir meN sab jalvah hai vajhu_llaah kaa
parbat meN nagar meN saagar meN Har utraa hai har jaa Jogii
jii shahr meN Khuub bahaltaa hai vaaN Husn pih 'ishq machaltaa hai
vaaN prem kaa saagar chaltaa hai chal dil kii pyaas bujhaa Jogii
vaaN dil kaa Ghunchah khiltaa hai galiyoN meN Mohan miltaa hai
chal shahr meN saNkh bajaa Jogii baazaar meN dhuunii ramaa Jogii
phir Jogii jii bedaar hu'e is chheR ne itnaa kaam kiyaa
phir 'ishq ke is matvaale ne yih vaHdat kaa ik jaam diyaa
in chiknii chupRii baaton se mat Jogii ko phuslaa baabaa
jo aag bujhaa’ii jatanoN se phir us pih nah tel giraa baabaa
hai shahroN meN Ghul-shor bahut awr kaam-krodh kaa zor bahut
baste haiN nagar meN chor bahut saadhoN kii hai ban meN jaa baabaa
hai shahr meN shorish-i-nafsaanii jaNgal meN hai jalvah ruuHaanii
hai nagrii-Dagrii kasrat kii ban vaHdat kaa daryaa baabaa
ham jaNgal ke phal khaate haiN chashmoN se pyaas bhujaate haiN
Raajah ke nah dvaare jaate haiN parjaa kii nahiiN parvaa baabaa
sar par aakaash kaa maNDal hai dhartii pih suhaanii maKHmal hai
din ko suuraj kii maHfil hai shab ko taaroN kii sabhaa baabaa
jab jhuum ke yaaN ghan aate haiN mastii kaa rang jamaate haiN
chashme tanbuur bajaate haiN gaatii hai malaar havaa baabaa
jab paNchhii mil-kar gaate haiN piitam ke saNdes sunaate haiN
sab ban ke birchh jhuk jaate haiN tham jaate haiN daryaa baabaa
hai Hirs-o-havaa kaa dhyaan tumheN awr yaad nahiiN Bhagvaan tumheN
sil patthar iiNT makaan tumheN dete haiN yih raah bhulaa baabaa
parmaatmaa kii vuh chaah nahiiN awr ruuH ko dil meN raah nahiiN
har baat meN apne matlab ke tum ghaR lete ho Khudaa baabaa
tan man ko dhan meN lagaate ho Har naam ko dil se bhulaate ho
maaTii meN la’l gaNvaate ho tum bandah-i-Hirs-o-havaa baabaa
dhan daulat aanii jaanii hai yih dunyaa Raam-kahaanii hai
yih ‘aalam ‘aalam-i-faanii hai baaqii hai zaat-i-Khudaa baabaa
Hissah-i-duvum---taraanah-i-vaHdat
jab se mastaane Jogii kaa mash_huur-i-jahaaN afsaanah hu’aa
us roz se bandah-i-Naazir bhii phir bazm meN naGhmah-saraa nah hu’aa
kabhii mansab-o-jaah kii chaaT rahii kabhii peT kii puujaa paaT rahii
lekin yih dil kaa kaNval nah khilaa aur Ghunchah-i-Khaatir vaa nah
hu'aa
kahiiN laag rahii kahiiN piit rahii kabhii haar rahii kabhii jiit
rahii
isii kal-jug kii yahii riit rahii ko'ii band se Gham kii rihaa nah
hu'aa
yuuN tiis baras jab ter hu’e ham kaar-i-jahaaN se ser hu’e
thaa ‘ahd-i-shabaab saraab-i-nazar vuh chashmah-i-aab baqaa nah hu’aa
phir shahr se jii uktaane lagaa phir shauq muhaar uThaane lagaa
phir Jogii jii ke darshan ko Naazir ik roz ravaanah hu’aa
kuchh roz meN Naazir jaa pahuNchaa phir hosh-rubaa nazaaroN meN
PaNjaab ke gard-GhubaaroN se Kashmiir ke baaGh-bahaaroN meN
phir ban-baasii beraagii kaa har samt suraaGh lagaane lagaa
Banihaal ke bhayaanak GhaaroN meN PaNjaal kii kaalii dhaaroN meN
apnaa to zamaanah biit gayaa sarkaaroN meN darbaaroN meN
par Jogii meraa sher rahaa parbat kii suunii GhaaroN meN
vuh din ko Tahaltaa-phirtaa thaa in qudrat ke gul-zaaroN meN
awr raat ko maHv-i-tamaashah thaa anbar ke chamakte taaroN meN
barfaab kaa thaa ik taal yahaaN yaa chaaNdii kaa thaa thaal yahaaN
almaas jaRaa thaa zamurrud meN yih taal nah thaa kuhsaaroN meN
taalaab ke ek kinaare par yih ban kaa raajah baiThaa thaa
thii fauj khaRii diivaaroN kii har samt buland HisaaroN meN
yaaN sabzah-o-gul kaa nazaarah thaa awr manzar pyaaraa pyaaraa thaa
phuuloN kaa taKHht utaaraa thaa pariyoN ne in kuh-saaroN meN
yaaN baad-i-saHar jab aatii thii bheroN kaa ThaaTh jamaatii thii
taalaab rabaab bajaataa thaa lahroN ke taRapte taaroN meN
kyaa mast-alast navaa’eN thiiN in qudrat ke nirmaaroN meN
malhaar kaa ruup thaa chashmoN meN saarang kaa rang favvaaroN meN
jab Jogii josh-i-vaHdat meN Har-naam kii zarb lagaataa thaa
ik guuNj sii chakkar lagaatii thii kuh-saaroN kii diivaaroN meN
is ‘ishq-o-havaa kii mastii se jab Jogii kuchh hushyaar hu’aa
is Khaak-nishiiN kii Khidmat meN yuuN Naazir ‘arz–guzaar hu’aa
kal rashk-i-chaman thii Khaak-i-vatan hai aaj vuh dasht balaa Jogii
vuh rishtah-i-ulfat Tuut gayaa ko’ii tasmah lagaa nah rahaa Jogii
barbaad bahut se gharaane hu’e aabaad haiN bandii-KHaane hu’e
shahroN meN hai shor ba-paa Jogii gaa'oN meN hai aah-o-bukaa Jogii
vuh josh junuuN ke zor hu’e insaan bhii DaNgar-Dhor hu’e
bachchoN kaa hai qatl ravaa Jogii buuRhoN kaa hai Khuun hibaa Jogii
yih masjid meN awr mandir meN har-roz tanaazu’ kaisaa hai
Pramiishar hai jo Hinduu kaa Muslim kaa vahii hai Khudaa Jogii
Kaashii kaa vuh chaahne vaalaa hai yih Makke kaa matvaalaa hai
Chhaatii se to Bhaarat-maataa kii donoN ne hai duudh piyaa Jogii
hai des meN aisii phuuT paRii ik qahr kii bijlii Tuut paRii
ruuThe mitroN ko manaa Jogii bichhRe biiroN ko milaa Jogii
ko’ii girtaa hai ko’ii chaltaa hai girtoN ko ko’ii kuchaltaa hai
sab ko ik chaal chalaa Jogii awr ek Dagar par laa Jogii
vuh mai-kadah hii baaqii nah rahaa vuh Khum nah rahaa saaqii nah rahaa
phir ‘ishq kaa jaam pilaa Jogii yih laag kii aag bujhaa Jogii
parbat ke nah suukhe ruukhoN ko yih prem ke giit sunaa Jogii
yih mast taraanah vaHdat kaa chal des kii dhun meN gaa Jogii
bhaktoN ke qadam jab aate haiN kal-jug ke klesh miTaate haiN
tham jaataa hai sail-i-balaa Jogii ruk jaataa hai tiir-i-qazaa Jogii
Naazir ne jo yih afsaanah Gham-i-ruu-daad-i-vatan kaa yaad kiyaa
Jogii ne ThaNDii saaNs bharii awr Naazir se irshaad kiyaa
Baabaa! ham Jogii ban-baasii jaNgal ke rahne vale haiN
is ban meN Dere Daale haiN jab tak yih ban haryaale haiN
is kaam-krodh ke dhaare se ham naa'o bachaa kar chalte haiN
jaate yaaN muNh meN magar-machh ke daryaa ke nahaane vaale haiN
hai des meN shor-pukaar bahut awr jhuuT kii hai parchaar bahut
vaaN raah dikhaane vaale bhii be-raah chalaane vaale haiN
kuchh laalach-lobh ke bande haiN kuchh makr-o-fareb ke phaNde haiN
muurakh ko phaNsaane vaale haiN makRii ke yih sab jaale haiN
jo des meN aag lagaate haiN phir us par tel giraate haiN
yih sab dozaKh kaa iiNdhan haiN aur nark ke sab yih nivaale haiN
Bhaarat ke pyaare puutoN kaa jo Khuun bahaane vaale haiN
kal chhaa'oN meN jis kii baiTheN ge vahii peR giraane vaale haiN
jo Khuun-Kharaabaa karte haiN aapas meN kaT kaT marte haiN
yih biir-bahaadur Bhaarat ko GhairoN se chhuRaane vaale haiN?
jo dharm kii jaR ko khodeN ge Bhaarat kii naa'o Dubo deN ge
yih des ko Dasne vaale haiN jo saaNp baGhal meN paale haiN
jo jiiv kii rakhshaa karte haiN awr KHauf-i-KHudaa se Darte haiN
Bhagvaan ko bhaane vaale haiN ‘iishvar ko rijhaane vaale haiN
dunyaa kaa hai surjan-haar vahii ma’buud vahii muKhtaar vahii
yih ka’bah kaliisaa but-KHaanah sab Dol usii ne Daale haiN
vuh sab kaa paalan-haaraa hai yih kunbah usii kaa saaraa hai
yih piile haiN yaa kaale haiN sab pyaar se us ne paale haiN
ko’ii Hindii ho kih Hijaazii ho, ko’ii Turkii ho yaa Taazii ho
jab niir piyaa ek maataa kaa sab ek gharaane vaale haiN
sab ek hii gat par naacheN ge sab ek hii raag alaapeN ge
kal Shyaam-kanhaiyaa phir ban meN murlii ko bajaane vaale haiN
aakaash ke niile gunbad se yih guuNj sunaa’ii detii hai
apnoN ko miTaane vaaloN ko kal Ghair miTaane vaale haiN
yih prem-saNdesaa Jogii kaa pahuNchaa do un mahaa-purshoN ko
saude meN jo Bhaarat-maataa ke tan-man ko lagaane vaale haiN
parmaatmaa ke vuh pyaare haiN awr des ke chaaNd sitaare haiN
aNdher-nagar meN vaHdat kii jo jot jagaane vaale haiN
Naazir yahiiN tum bhii aa baiTho awr ban meN dhuunii ramaa baiTho
shahroN meN guru phir chiiloN ko ko’ii naach nachaane vaale haiN